monumenta.ch > Hieronymus > sectio 4

Word Selection for Searching

Report an Error in this Sectio
Hieronymus, Epistulae, 3, 77, 4
Sed quid ego in abolitis et antiquis moror, quaerens excusare culpam, cuius poenitentiam ipsa confessa est? Quis hoc crederet, ut post mortem secundi viri in semetipsam reversa, quo tempore solent viduae negligentes, iugo servitutis excusso, agere se liberius, adire balneas, volitare per plateas, vultus circumferre meretricios; saccum indueret, ut errorem publice fateretur; et tota urbe spectante Romana, ante diem Paschae in Basilica quondam Leterani, qui Caesariano truncatus est gladio, staret in ordine poenitentium, Episcopo, Presbyteris, et omni populo collacrymantibus, sparsum crinem, ora lurida, squalidas manus, sordida colla submitteret? Quae peccata fletus iste non purget? quas inveteratas maculas haec lamenta non abluant? Petrus trinam negationem trina confessione delevit . Aaron sacrilegium, et conflatum ex auro vituli caput, fraternae correxere preces . David sancti et mansuetissimi viri homicidium pariter et adulterium, septem dierum emendavit fames . Iacebat in terra, volutabatur in cinere, et oblitus regiae potestatis, lumen quaerebat in tenebris. Illumque tantum respiciens quem offenderat, lacrymabili voce dicebat: Tibi soli peccavi, et malum coram te feci . Et: Redde mihi laetitiam salutaris tui, et spiritu principali confirma me . Atque factum est, ut qui me prius docuerat virtutibus, suis, quomodo stans non caderem, doceret per poenitentiam, quomodo cadens resurgerem. Quid tam impium legimus inter reges, quam Achab, de quo Scriptura dicit; Non fuit alius talis ut Achab, qui venundatus est, ut faceret malum in conspectu Domini? Hic cum propter sanguinem Nabuthae correptus fuisset ab Elia, et audisset iram Domini per Prophetam: 'Occidisti, et insuper possedisti: et ecce ego inducam super te malum, et demetam posteriora tua,' et reliqua: scidit vestimenta sua, et operuit cilicio carnem suam, ieiunabatque in sacco, et ambulabat demisso capite. Tunc factus est sermo Dei ad Eliam Thesbyten, dicens: 'Nonne vidisti Achab humiliatum coram me? Quia ergo humiliatus est mei causa, non inducam malum in diebus eius.' O felix poenitentia, quae ad se Dei traxit oculos, quae furentem sententiam Dei, confesso errore mutavit. Hoc idem et Manassen in Paralipomenon , et Niniven fecisse legimus in Propheta , Publicanum quoque in Evangelio . E quibus primus non solum indulgentiam, sed et regnum recipere meruit; alter impendentem Dei fregit iram; tertius pectus verberans, pugnis, oculos non levabat ad coelum; et multo iustificatior recessit Publicanus humili confessione vitiorum, quam Pharisaeus superba iactatione virtutum. Non est loci huius ut poenitentiam praedicem, et quasi contra Montanum, Novatumque scribens dicam, illam hostiam Domino esse placabilem ; et, 'Sacrificium Deo, spiritum contribulatum' : Et, 'Malo poenitentiam peccatoris, quam mortem:' ; Et, 'Exsurge, exsurge Ierusalem' ; et multa alia, quae prophetarum clangunt tubae.